|
Por iso hai tamén un alento costumista consubstancial a moitas destas imaxes. A xente contemplando unha corrida na antiga Praza de Touros desde a elevada terraza da súa casa. Unha riada de siareiros dos tempos prehistóricos -se tomamos como referencia o Super-Dépor actual-, acudindo pola Praza de Pontevedra e a avenida de Rubine ao Estadio, algúns en moto, coa moza á grupa como nun filme neorrealista italiano. O aura de filme antigo dalgún voyeur traxeado afuciñando para os bañistas na populosa praia de Riazor, ou os mozos con talante de galáns dun filme da época do twist ou uns boleros da cor do tempo ou da saudade. E esas Vespas e Lambrettas alineadas no Cantón... Ou as casetas de baño e os recatados bañadores e volantes das damas do antigo Riazor... Ou unha Palavea totalmente rural, co seu lavadeiro, a bici -¡ah o “Ladrón de Bicicletas”!- apoiada fronte á porta da casa, e as mulleres transportando a auga na sella... ¡Pero se ata hai, se un ben se fixa, un can espiollándose na rúa e outras moitas curiosidades e anécdotas cotiáns!... Ás veces, o costumista e o histórico fúndense como nunha vella crónica sentimental, como nese cartel que anuncia a Raquel Meller no antigo teatro Linares Rivas, coincidindo coa moitedume concentrada para un mítin, nas calendas republicanas do axitado 1934.
| 
